Дьоҥҥо көмө буолаарай диэн

Авторы:


Откровение
Темы: , , , , , .

Бу ахтыыбын мин, 70 сааспар диэри олохпун туох да итэҕэлэ суох мээнэ олорон кэлбит киһи, сааһыран баран православнай итэҕэли ылына сатыы сылдьар кэммэр тирэх буолаарай диэн, “Логос” хаһыакка суруйарга сананным. Баҕар, эмиэ мин курдук муна-тэнэ сылдьар дьоҥҥо көмө буолуоҕа.

Дьэ маннык. Миэхэ, улахан аймаҕа-чаҕара суох киһиэхэ, балтым кэриэтэ үчүгэйдик саныыр кыыһым Дарья (миигин эдьиийим диэн ааттааччы), олох ханан да аймах буолбатах эрээри, ыалдьыттыы кэлэ сырытта. Ол сылдьан миэхэ өр сыл бииргэ үлэлээбит киһитин, кэлин чугас дьүөгэтэ буолбут коллегатын, туһунан кэпсээтэ. Дарья кэпсээнэ дууһабын таарыйан итэҕэлбин бөҕөргөттө, ол иһин бу суруйабын. Дьүөгэтэ Ира 8 сыл устата улахан үтүөрбэт ыарыыга ылларан эрэйи-муҥу көрбүт.

Кини дьоҥҥо мээнэ суҥхара сылдьыбат, ыарыытын биллэрэ сатаабат эбит; сүрдээх сэмэй, чиэһинэй, ыраас дууһалаах, эйэҕэс, наар үчүгэйи эрэ оҥорорго дьулуһар үлэһит кыыс эбит. Бэйэтэ туох да итэҕэлэ суох, сүрэхтэммэтэх киһи. Онтон куорат онкологическай балыыһатыгар эмтэнэ сытан, Таҥара туһунан билэн сүрэхтэммит, православнай итэҕэли ылыммыт. Мэлииппэ ааҕар буолбут итиэннэ хаста да аньыытын аҕабыыкка этинэн Таҥараҕа тиксибит. Библияны бэйэтиттэн араарбакка ааҕар, өйдүү сатыыр буолбут. Дьүөгэтигэр Дарьяҕа билиммит: “Библияны ааҕарбар элбэҕи өйдөөбөппүн, ол да буоллар ааҕабын”, – диэн. Уонна, төһө да ыараханнык ыалдьан сыттар, чугас дьоно этэҥҥэ олороллорун туһугар үҥэр эбит.

Ново-Никольский храм Якутск

Фото Николая Дьяконова

Олоҕун тиһэх күннэригэр дьүөгэтин Дарьяны көрүөн баҕарарын дьонугар эппит. Дьокуускайга баар Дарья ону истээт, тугу барытын быраҕан улууска дьүөгэтин көрсө барбыт. Ира сүрдээҕин үөрбүт уонна, ыарыытын да умнубут курдук, укуол ылбакка истиҥник кэпсэппит. Бу тиһэх көрсүһүүлэрэ буоларын билэ сытан, астымматын – атын дьүөгэлэрэ Дарья курдук наҕыллык истибэттэрин, кэпсэппэккэ,  ытаан тахсалларын уонна кинини уоскутаары сымыйанан үтүөрүөҥ дииллэрин – сэмэлиир курдук ахтыбыт. Арахсалларыгар иккиэн ытаспыттар, тиһэҕэр Ира: “Мин өлөртөн куттаммаппын, өлөргө бэлэммин”, – диэбит уонна: ”Куһаҕан буолбут сурахпын иһиттэххинэ, кэлэ сатаар”, – диэн көрдөспүт.

Ира өлбүт сураҕын истээт да, Дарья похоронаҕа барбыт. Дьүөгэтин 40 хонугар  ийэтэ, бары аймахтара, чугас табаарыстара мустубуттар. Онно бокуонньук туһунан ахтыһыыга Николай, Дарья бииргэ үөрэммит табаарыһа уонна балыыһаҕа эмтэммит бырааһа, бары истэллэригэр түүлүн кэпсээбит. Арай, түһээтэҕинэ, Ира көбүөр устун хааман Никольскай  Таҥара дьиэтигэр баран иһэр үһү. Николай ыҥыран көрбүт да, Ира истибэккэ киирэн бара турбут. Храм ааныгар кинини маҥан таҥастаах аҕабыыттар көрсөн, Таҥара дьиэтигэр арыаллаан киллэрбиттэр. Николай ону көрөн турдаҕына, чочумча буолаат, храм үрдүнэн чэпчэки баҕайы маҥан былыт дуу, буруо дуу халлааҥҥа өрө устан тахсыбыт.

Маннык дьикти түүлү истибиттэр итини бука бары сөхпүттэр. Николай бэйэтэ эмиэ улаханнык дьиктиргиир эбит. Арай бокуонньук  ийэтэ: ”Оҕом, кыыһым дууһата ырайга көппүт!” – диэн үөрбүт. Мин Дарьяттан истибиппин бэйэм курдук кыра итэҕэллээх дьоҥҥо анаан, Таҥараҕа кэлэллэригэр көмө буолаарай диэн, суруйдум.

М.Д. АММОСОВА,
Дьокуускай куорат

На заставке фото Марины Юрченко